SCO બેઠક માટે ભારત પાકિસ્તાનના વડાપ્રધાન ઈમરાન ખાનને પણ આમંત્રણ પાઠવશે!

નવી દિલ્હી: ભારત શાંઘાઈ સહયોગ સંગઠન (SCO)ની વાર્ષિક બેઠકમાં પાકિસ્તાનના વડાપ્રધાન ઈમરાન ખાનને આમંત્રણ પાઠવશે. ભારત આ વર્ષે શાંઘાઈ સહયોગ સંગઠનની વાર્ષિક બેઠકની મેજબાની કરશે. વિદેશ મંત્રાલયના પ્રવક્તા રવિશકુમારે આજે આ જાણકારી આપી. 

વિદેશ મંત્રાલયના પ્રવક્તા રવીશકુમારે આજે એક પ્રેસ કોન્ફરન્સને સંબોધતા કહ્યું કે "હવે એ સ્પષ્ટ છે કે ભારત આ વર્ષના અંતમાં એસસીઓ પરિષદના પ્રમુખોની બેઠકની મેજબાની કરશે. આ બેઠક વડાપ્રધાન સ્તરે દર વર્ષે આયોજિત કરાય છે અને તેમાં એસસીઓના કાર્યક્રમ અને બહુપક્ષીય આર્થિક અને વેપારને લઈને ચર્ચાઓ કરાય છે". બેઠકમાં પાકિસ્તાનના વડાપ્રધાન ઈમરાન ખાનને આમંત્રણ આપવાના સવાલ પર તેમણે કહ્યું કે "તમામ આઠ દેશો અને ચાર પર્યવેક્ષકોને આમંત્રણ આપવામાં આવશે."